- Gipuzkoako ordezkaritzak, Ekonomia Sustapenaren eta Proiektu Estrategikoen diputatua buru duela, zientzia aurreratuan oinarritutako transferentzia teknologikoari buruzko nazioarteko foro nagusietako batean parte hartu du.
- Topaketan parte hartzea Gipuzkoak duen estrategiaren barruan kokatzen da mugako teknologiak bultzatzeko, arlo publikoaren eta pribatuaren arteko lankidetza sustatzeko eta balio erantsi handiko ekosistema berritzaile bat finkatzeko.
Gipuzkoako Foru Aldundiak Madrilgo Science for Industry (S4i) azokan parte hartu du gaur. Azoka hori zientzia aurreratuan oinarritutako transferentzia teknologikoari buruzko nazioarteko topaketa nagusietako bat da. Ordezkaritzak, Unai Andueza Ekonomia Sustapeneko eta Proiektu Estrategikoetako diputatua buru dela, Deep Tech alorrean lankidetza-aukera berriak aztertu ditu. Topaketan, 3.000 parte-hartzaile baino gehiago bildu dira –unibertsitateak, ikerketa-zentroak, startup-ak, enpresak eta mundu osoko inbertitzaileak– ezagutza trukatzeko eta lankidetza-aukerak aztertzeko.
“Gipuzkoak foro honetan parte hartzeak indartu egiten du Deep Tech-en Europako erreferente gisa kokatzeko dugun estrategia, zientzia aurreratua garapen ekonomikoarekin lotuz eta lankidetza publiko-pribatua sustatuz”, nabarmendu du Unai Anduezak.
Ekitaldia funtsezko espazio gisa finkatu da sortzen ari diren joerak identifikatzeko, aliantza estrategikoak sustatzeko eta teknologia disruptiboen garapena bizkortzeko. Gipuzkoaren presentziak indartu egiten du mugako teknologietan Europako erreferentziazko ekosistema gisa kokatzeko estrategia, berrikuntza eta lankidetza publiko-pribatua sustatuz.
Deep Tech sustatzea, Kutxa Fundazioarekin batera
Esparru horretan, Gipuzkoako Foru Aldundiak, Kutxa Fundazioarekin batera, deep tech ekintzailetzarekiko konpromisoa indartu zuen iaz, 5 milioi euroko inbertsioaren bidez, fase goiztiarretan startup-ei eta ETE teknologikoei laguntzeko. Ekimena Deeptek Gipuzkoa Fundazioaren bidez egituratu zen. Fundazio horrek bere jarduera-eremua zabaldu zuen hainbat diziplinatara, hala nola adimen artifizialera, bioteknologiara, blockchain-era, teknologia kuantikoetara eta material berrietara.
Kutxa Fundazioak lankidetza honen funtsezko eginkizuna azpimarratu du, nabarmenduz XXI. mendean zientzia, ikerketa teknologikoa eta berrikuntza direla enpresa-garapenaren oinarri, eta, ondorioz, edozein lurralderen aurrerapenaren zutabe nagusi. Hori da, hain zuzen ere, Foru Aldundiaren eta Kutxa Fundazioaren arteko proposamen bateratu honen jatorria. Deeptek Gipuzkoa ekimenak ekosistema teknologikoa indartzen lagundu nahi du, sektore biosanitarioaren garapenarekin batera, arlo horretan kalitatezko proiektuak identifikatuz eta proiektu horiek merkaturatzen lagunduz, betiere zorroztasunetik abiatuta eta baliabide finantzarioak eskainiz.
S4i azokan Gipuzkoako ordezkaritzak bilerak egin ditu ekosistema zientifiko-teknologikoko funtsezko eragileekin, eta Gipuzkoa Deep Tech-eko hub europar gisa kokatzeko lurralde-estrategiarekin bat datozen aukerak aztertu ditu.
Foru hauetan parte hartzeak aukera ematen du ezagutza ekoizpen-sarera transferitzeko, lankidetza publiko-pribatua sustatzeko eta berrikuntzan, zientzian eta teknologia aurreratuan oinarritutako eredu ekonomiko baterantz aurrera egiteko.
